BIBLIOTRÁILER "KIKA SUPERBRUXA E OS PIRATAS"

O alumnado de 2º A leu este curso, durante as "Horas de Ler", "Kika Superbruxa e os Piratas". Logo da lectura elaboraron o "Guión Gráfico" ou "Storyboard", e partindo dos seus guións fixeron este bibliotráiler. Agardamos que vos guste!

A CARTELEIRA DO "CINEMA TORRE ILLA"

Xa está no corredor da planta baixa do colexio a exposición da carteleira coas películas e cortos traballados durante este curso no proxecto "Emocinéate". A exposición poderase visitar entre as 9:15 e as 11:15 esta semana.

MENCIÓN ESPECIAL PARA "MI PESADILLA FAVORITA"

O Centro Nacional de Innovación e Investigación Educativa (CNII), mediante a plataforma "Leer.es", ven de distinguir cunha "Mención Especial" do xurado o traballo do alumnado de 5º de Educación Primaria na elaboración dun "bibliotráiler". A obra escollida foi "O meu pesadelo favorito", de María Solar. O bibliotráiler creouse coa técnica "Stop Motion". Este traballo forma parte do proxecto que a biblioteca do centro está a desenvolver neste curso, relacionado co cine e as emocións. Parabéns ó noso alumnado!

BIBLIOTRÁILER O MEU PESADELO FAVORITO

O alumnado de 5º A realizou un "bibliotráiler" da obra de María Solar "O meu pesadelo favorito", que previamente leron de xeito conxunto na aula durante as "Horas de Ler". O bibliotráiler realizouse coa técnica "Stop Motion". Agardamos que vos guste.

VISITA DE FINA CASALDERREY

Onte o alumnado de 5º e 6º de Educación Primaria tivo un encontro coa escritora Fina Casalderrey no salón de plenos do Concello da Illa, que organizou este encontro. Todo o alumnado tivo ocasión de coñecer máis polo miúdo a obra da homenaxeada no día das Letras Galegas, e o libro "María Victoria Moreno. A muller que durmía pouco e soñaba moito," de Fina e Marilar Alexandre. Aproveitando a ocasión, o alumnado de 6º preparou unha entrevista que pronto poderemos ver en "Carcamán tv".

NOTICIA DE "LA VOZ DE GALICIA"

NOTICIA DO FARO DE VIGO

LETRAS GALEGAS 2018

O expositor da biblioteca adicado ás "Letras Galegas 2018" ten varias colecións con libros de María Victoria Moreno, doadas polo concello, para seguir traballando á homenaxeada este ano no "Día das Letras Galegas".

Tamén podedes consultar os exemplares da "Revista Carcamán" deste curso, que ten coma protagonista de portada á nosa mascota caracterizada de superheroína. 

ABRIL, MES DOS LIBROS

 Abril é o mes dos libros no CEIP Torre Illa. A conmemoración o 2 de abril do "Día Internacional do Libro Infantil e Xuvenil", e a celebración da"Semana do libro" do 23 ó 27 de abril enche as "Horas de Ler", os patios e as aulas de actividades moi variadas arredor da lectura.

Nos recreos da "Semana do libro" fixemos intercambio de libros no "TROCOBOOK"

Tamén visitounos Anxo Moure para contarnos algúns contos e reciclar as malas novas que saen nos xornais.

Os intercambios de lectores entre aulas deixaron momentos coma este en Educación Infantil.

E os "apadriñamentos lectores" encheron todos os recunchos do patio para que os maiores agasallaran cunha lectura ós máis pequenos.

APADRIÑAMENTOS LECTORES NA SEMANA DO LIBRO

ELABORANDO O GUIÓN GRÁFICO

O alumnado de segundo de primaria xa ten o guión gráfico ou story board para a elaboración do seu bibliotráiler ou booktrailer. Logo de ver como son os bibliotráilers doutros libros puxéronse mans á obra. Estamos desexando velo!!!

UN DESFILE DE PELÍCULA

O entroido do colexio encheu de cor, unha vez máis, as rúas da Illa de Arousa. O proxecto deste ano inspirou o tema, e servíu para afondar un pouco máis no mundo do cine.

 noticia do Faro de Vigo

PROXECTO CINE E EMOCIÓN

Este curso continuaremos afondando nas emocións, e desta volta o faremos da man do cine. O curso  pasado iniciamos co proxecto "Emocionarte" un percorrido polas emocións e a arte, que agora poderemos continuar da man do cine. O cine será o instrumento pedagóxico que guiará a investigación arredor das relacións interpersoais, os conflictos, as paixóns e as emocións, ó mesmo tempo que desenvolvemos os contidos propios das diferentes áreas. 

OS LIBROS LIBERADOS VOLTAN Á BIBLIOTECA

Os libros liberados pola Illa de Arousa no Bookcrossing do curso pasado comezan a chegar de volta á biblioteca do cole. Deixan atrás aventuras e viaxes pola localidade, e xa están dispostos a  pasar o inverno na biblioteca. 

Nos diarios da viaxe que realizaron comprobamos que fixeron un longo percorrido. Nestas aventuras, un dos libros atopouse con Adrián e Jorge, dous nenos de Valverde del Fresno, na provincia de Cáceres, que nos deixaron esta nota. Alegrámonos de que vos gustase a iniciativa, e que todos os que atopáchedes un "libro libre" gozárades coa lectura.

APRENDER A PENSAR NA BIBLIOTECA ESCOLAR

Xa temos nos corredores os carteis deste curso da biblioteca. "Aprender a pensar coa biblioteca escolar" é o lema escollido para os materiais que a Consellería de Cultura, Educación e Ordenación Universitaria edita a comezos do curso 2017/2018 con destino ás bibliotecas escolares dos centros educativos galegos. O ilustrador Xosé Tomás foi o encargado, nesta ocasión, de realizar a  interpretación gráfica do lema anual.